سَوَائي

قالوا عالحُب الحقيقي  .. إنه طول العُمر باقي

وانتي أول حُب اصادفُه .. بس وَرْدُه ما لوشي ساقي

رغم دا ذِكراكي حِيرَه .. بين وفائي وكبريائي

***

افتكرت انِّ احنا ممكن .. ييجي يوم في الجَنَّه نسكن

وفْ هوانا ندوم سنين .. بس صبرِك كان ضَنين

أول القطر امَّا جالِك .. إنفَلَتِّي وشُفْتي حالِك

وانْدَهَس حُبِّي وشوقي .. وبقِت ذِكراكي دائي

قالوا عالحُب الحقيقي  .. إنه طول العُمر باقي ..

***

الأَطِبَّا حاروا فِيَّا .. مِن آثار الغدر بِيَّا

من ذهولي من جنوني .. إني اصون وانتي تخوني

عملوا عالأعصاب تجارِب .. قطَّعوا احبال الحبايب

خيَّروني فْ عِزِّ ضيقي .. بين هواكي وبين سوائي

قالوا عالحُب الحقيقي  .. إنه طول العُمر باقي ..

***

اختيارِك كان جنون .. وإيمان باطِل مُهين

وانِّي احنِّ لُه غَبَا .. وَاخْرُه جَلسة كهربا

لاجل دا أنا شوقي وارِد .. إنما ساكن وبارد

باحلم انِّك تِرْوي شوقي .. إنما يوم انتهائي

 قالوا عالحُب الحقيقي  .. إنه طول العُمر باقي ..

================

يا رب تمم نعمتك

مُرسي مصري ، ومصر مرسي مصر واعْدَه بْخير كبير

للي يفهم واللي يعلم .. إنُّه عند الله أجير

***

ربنا اختار لي الوَطَن .. ربنا اختار لي الزمن

اللي رجعت فيه إرادتي .. وانتخاباتي لْقِيادتي

والعَمَل واجِب عليَّا .. اعيد بُنا بَلدي بإديَّا

واحرس الأرض بضمير

مُرسي مصري ، ومصر مرسي مصر واعْدَه بْخير كبير

للي يفهم واللي يعلم .. إنُّه عند الله أجير

***

الرئيس كل امَّا اشوفُه .. باحمد الله عالنجاه

من كابوس كان طاغي خوفُه .. مِ اللي متنافِس معاه

لازم احمد ربي واشكر .. لاجل ربي يزيدني أكتر

واحنا محتاجين كتير

مُرسي مصري ، ومصر مرسي مصر واعْدَه بْخير كبير

للي يفهم واللي يعلم .. إنُّه عند الله أجير

***

ثَمَن الحُريه غالي .. لما اشوف ليبيا وسوريا

باحمدُه على كل حالي .. فضل مولايا عليَّا

واجب الشكر ولا بُدّ .. أشكره بلسان ويَد

ناذرَه تبذل كل خير

مُرسي مصري ، ومصر مرسي مصر واعْدَه بْخير كبير

للي يفهم واللي يعلم .. إنُّه عند الله أجير

=============

مبروك

مبروك عليكي يامصر .. يا غاليَه دستورك

ابني حضارة العَصر .. راسخَه على جدورك

***

امضي يا مُرسي خلاص .. الشعْب صار جارَك

بالجِدّ والإخلاص .. جاري فِ مِشوارَك

مِ الكُوخ لأكْبَر قصر .. يا بلدنا قاد نورِك

مبروك عليكي يامصر .. يا غاليَه دستورك

ابني حضارة العَصر .. راسخَه على جدورك

***

الكذابين ما بقوش .. يخْفو على شَعْبِك

قِلَّه ما يحتكموش .. يثيرو مَتاعبِك

و«نَعَمْ» تفوق الحَصر .. بيعِيدها جُمهورِك

مبروك عليكي يامصر .. يا غاليَه دستورك

ابني حضارة العَصر .. راسخَه على جدورك

***

صَلِّي صلاة الشُّكْر .. يا شَعْب لِلخلاق

يزيد رِضاك والأجْر .. ويوسَّع الأرزاق

ويْتَوَّجِك بالنصر .. يا بلدي وسرورِك

مبروك عليكي يامصر .. يا غاليَه دستورك

ابني حضارة العَصر .. راسخَه على جدورك

***

الله وعدنا بْفَضْل .. وبجود مع التقوى

وشْطانْنا وَعْدُه الذُّلّ .. وربنا الأقوَى

فما تْخافِيش الفَقْر .. والخير مالي بْحورِك

مبروك عليكي يامصر .. يا غاليَه دستورك

ابني حضارة العَصر .. راسخَه على جدورك

=============

الحوار

مرسي من الثوَّار .. مرسي تاج الأحرار

شالوه على اكتافهم .. للقصْر وهتافهم :

ها نكمِّل المشوار

***

قبْل الأوان بزمان .. كان مرسي في الميدان

ثاير مع الإخوان .. تاريخ مالوش نُكران

يا حِزب يا كَفَّار

مرسي من الثوَّار .. مرسي تاج الأحرار

شالوه على اكتافهم .. للقصْر وهتافهم :

ها نكمِّل المشوار

***

الثورَه واتحققِتْ .. أو ماضيَه في التحقيق

مطالبْها لما بقت .. لِنا جمهوريَّه تْليق

بكدْح واستقرار

مرسي من الثوَّار .. مرسي تاج الأحرار

شالوه على اكتافهم .. للقصْر وهتافهم :

ها نكمِّل المشوار

***

واجب الحوار اتوجد .. للعاقِلين موصوف

ما تغرَّقوش البلَد .. بالانقسام للصفوف

دا الانقسام هَدَّار

مرسي من الثوَّار .. مرسي تاج الأحرار

شالوه على اكتافهم .. للقصْر وهتافهم :

ها نكمِّل المشوار

***

الأُمَّه ساعْيَه بْجَدّ .. للوحْدَه وِجَناها

وثمارها فوق الحَدّ .. للي بيرعاها

والفُرْقَه زيِّ النار

مرسي من الثوَّار .. مرسي تاج الأحرار

شالوه على اكتافهم .. للقصْر وهتافهم :

ها نكمِّل المشوار

===============

شعارات للثوار الحق

كلمات

أيمن عز الدين علي السيد ..

الإخوان والنور والأزهر  .. كُلُّه يا مُرسي مْعاك بيكبَّر

مين إسلامي عاداك أو خالفَك .. كل السَّنَّه مْعاك وفْ صَفَّك

الأقباط عارفين مصالحهم .. ونِّ الدستور جَيْ فِ صالحهم

مصر ازاي ودي بلَد النور .. تفضل فوضَى بْدون دستور

كل كلامك صدق يا ريس .. دي مؤامْرَه وبان خيطها كويس

سامع أم شهيد بِتْنادي .. الإنقاذ ضَيَّع أولادي

إنت الوالد إنت الأب .. واللي يسبّ أبوه يتْسَبّ

عارفين ليه عارضَك حامدين .. علشان خَدْت الناس للدين

يا إعلام مليان تضليل .. جا لك حازم ابو اسماعيل

لو راح مرسي ها تِفْضَل مصر .. إسلاميَّه لآخر عصر

أعداءك صَنْعَه خارجيَّه .. ما تعيشِّي فْ بيئَه مصريِّه

سيبو عداوة الصالحين .. للفاسدين أو الطالْحين

فُوتُو مكانكم لينا فوتو .. الأزهر إدَّانا صوتُه

الله أكبر الله أكبر .. إحنا معانا الله والأزهر

الفاشلين فِ رياسة الدوْلَه .. جايين يخْسَرو آخر جوْلَه

الإنصاف يا كل بريء .. ترْك الكِلمَه للصناديق

إصحا يا شعْب لْمُكتسباتك ..لا يْحِلّ الحاقدين هيئاتَك

بيقولو سلقوا الدستور .. يعني اتهرا دول ست شهور

الدستور كرامَه وحريَّه .. رَدّ حقوقنا مِيَّه المِيَّه

الشعب بيستفتي الأزهر .. والأزهر وايَّاك بيكبَّر

الدستور ما هوش مسلوق .. سِت شهور نسْبُك وندوق

غَيَّر واصدر مِيت إعلان .. إنتَ رئيس جَيْ مِ الميدان

الثعابين السودا خافو .. لمّا كشفْت النايب اتشافو

لمّا علنت تحَصَّن نفسك .. كان علشان للثعابين تِمْسِك

إنتَ قَصَدْتِ تْجِيب للشهدا .. حَقَّها مِ الواصْلِينِ الْبُعَدا

حاربْ حارب الفساد .. نادي حَيِّ على الجِهاد

طول ما الحَيَّه راسْها سليمَه .. انتصاراتنا ما لْهاش قِيمَه

لو ها يعَدِّي يا طالوت .. عُشْرِنا بس معاك ها نفُوت

إحنا قَصَدْنا فِيك الجَنَّه .. وها نِسْعَى وْمش ها نِسْتَنَّى

سِير على بَرَكةْ ربّ الكون .. إنتَ وَرَاك تسعين مليون

الثلاثاء11/12/2012 – م .

دستور الشهور

كل الشعب المؤْمن عارف .. إنّ رئيسنا مُرسي الصالِح

ما بْيبْخَلشِ بْجَهْد وْصارِف .. رُوحُه عشان أُمِّتُه تِتْصالح

وِنِّ الناس اللي مْعارضينُه .. لا مَسِيحِي ولا مُسْلِم دِينُه .. يأمرُه غير عالحق يعينُه

لكن فينا غرير مش شايف .. وكْتير فاسد وكتير طالِح

***

عَمَلُمْ جَبْهَه لإجهاز وَثَنِي .. عالدِّين والأمَّه وْتَفْكِيكْها

مِن أذْناب الحِزب الوطني .. واللي ارْتَضَى إنُّه يشاركها

والفاشلين فِ رْياسة الدَّوله .. الخاسرين جَوله وَرَا جَوله

واللي هواه الباطل صادِف .. حَرْب الحِزْب الأتْقَى الناجِح

***

طلَبوا يْهِدُّوا مصر الثوْرَه .. ويْفَتِّتُوا إنجازْها الضَّخْم

مِ الريس للَّجْنَه الحُرَّه .. للمجلِس بمعاول هَدْم

والدستور يُقْعُد لُه كمان .. سَنه فوضى أو عشْرَه كمان

ونْضيع فُرْصَه وبورصَه وآسف .. دُول خَوَنَه وغَرَضْهم واضِح

***

لكنِ الريس طوِّل بالُه .. واتْنازِل فِ حْقوقُه ولكِنْ

صان إنجاز الثورَه بْحالُه .. واتظاهْروا بْباطل فِ أماكن

منها مكان القصر بتاعُه .. نادى فْ حَرَسُه بْحِلم يساعوا

غِلِّ الجَبْهَه الغالي الجارِف .. وأذاهُم والشَّرِّ الطافِح

***

وامَّا ما قامْشي بْغَلْطَة معاهُم .. حَرَقُوا مَقَرَّات الحُرِّيَّه

حِزب الريس سَفَكُوا دِماهُم .. حِزْب الغالبيَّه المصريَّه

 والريس واخْوان الأمْس .. صابرين راضعين ضبْط النَّفْس

للدستور واقفين ، كُن واقِف .. واعِي يا شعب وآبي وناصِح

***

الدستور خَدْ سِت شهور .. واللجْنَه مِن أفذاذ مصر

جالْهُم فوق المِيت دستور .. دَرَسُوهم بِلِجان بِلا حَصْر

سِمْعُو الرأي الشعبي الحافِل .. اللي معاهم راح واتواصِل

جَهْد يْفُوق توصيف الواصِف .. ألْف نعَمْ قولها وكون رابح

================

مش ثوار علشان ثوار

مش بنأيِّد كل قرار ... ولا بنْعارِض كل قرار

ولا ثوَّار علشان ثوَّار ... احنا كمان مع لاستقرار

***

الدستور قالو مسلوق ... طب مسلوق أو مش مسلوق

قبل ما تنكر جَرَّب دوق ... والا كلامك بس هزار

***

لو فيـ عماره بدون ترخيص ... فوق أرضك فَ احسن تأسيس

ليه تهْدمها ، صادِرْها ، وقيس ... لَجْنَه وْ مجلس ليه تِنْهار

***

اللي يعارِض يدْلي برأيُه ... مش بيقلِّد واحد زيُّه

والاتنين ورا تالت عِميو ... دا الإنسان ميزتُه الأفكار

***

فين ثورتنا الإنسانيَّه ... اللي مْنادِيَّه : سِلْمِيَّه

أما البادأه بالهمجيَّه ... دي اللي بتحمل كل العار

***

سيبو بلدنا تفوق تتنفِّس ... تفرح فَتْرِتْها بالرَّيِّس

وِن ما طلعش كلامُه كويس ... حاسبوه فِ نْهاية المشوار

===================

الثايرين عَ الثورَه

اِصحا يا شعْب لْمُكْتسَباتَك .. واحميها بعَزِيمَه وْقُدْرَه

اللي مْهَدِّد كل حياتَك .. القايمين عَ الثورَه بْثوره

دول ثايرين على لَجْنَه وْمجْلس .. مُنتَخَبين وكمان الريِّس

قُل لاولادَك قُل لاخواتَك .. ادُّونا فُرْصَه وْحاكْمُونا بُكْرَه

***

مِيـ اللي مْضَيَّع حق الشُّهدا .. إلا النايب والباقْيين -

عَ البائِد واعْوانُه البُعَدا .. والمتْحَلِّل مِ القوانين

سيبو الريس يُحكم وَحْدُه .. ويَّا رْجالُه فِ سْنين عَهْدُه

مش لو خَطَّى لْقُدَّام واحدَه .. بتْشِدُّونا لْورا عشرين

برئيس توصَل برّ نجاتَك .. لا المركبَه تِغْرَق بالمَرَّه

اِصحا يا شعْب لْمُكْتسَباتَك .. واحميها بعَزِيمَه وْقُدْرَه

***

ريِّس جا لْنا ديمقراطي .. بيقول كُلُّكو أهلي وناسي

والدين ما أصلَح لي حياتي .. مش متهوّر لكن راسي

لُه مشروع مدروس لِلنَّهْضَه .. ببلدنا موافقين ومعارْضَه

جيب ويَّاه الفَجْر الآتي .. مش مع خونَه طالبَه كراسي

طَلَبُوا آمِيرْكا فَ اخَصِّ حاجاتَك .. تتدخل ؛ دُولْ أولادْ بَرَّا

اِصحا يا شعْب لْمُكْتسَباتَك .. واحميها بعَزِيمَه وْقُدْرَه

***

إنتَ يا شعْب يا مصري أصيل .. إنتَ خرجْت تقول : سِلْمِيَّه

فاحذر دُول أصحاب تَضْليل .. ضربو مقار حزب الحُرّيّه

عايزين تِوْلع مصر بْحالها .. ولا يصلحش الرَّزَّاق حالها

دَعْوِتهم دَعْوِة تعطيل .. ناس مأجورَه ، يا عَوَاطْلِيَّه ..

وانتَ الساعي على واجباتَك .. إيدَك طاهرَه ونَفْسَك حُرَّه

اِصحا يا شعْب لْمُكْتسَباتَك .. واحميها بعَزِيمَه وْقُدْرَه

==================

النايب

لو الفلول ليهم جُدُور .. جُوَّا القضاء قايمين بدور

فِ حماية الظَّلَمَه القُدام .. وكأنهم حاكمين تمام

وَانَا شيلتُهم مِن النظام .. ازَّي تقول انا ديكتاتور

***

أيًّا يكون رجال مبارك .. لو في القضاء والا فِ دارَك

لازم يسيبو الثورَه تِكْمَل .. وحكومة العدالَه تِعْدِل

وإلا تختلط الأمور .. وأبقى عَ الثورَه باثُور

***

فين نبرة الثورَه الأبيَّه .. سِلْمِيَّه لا للبلطجيَّه

خارجَه على ظالِم صُراح .. مطالبْها حَقّ الأغلبيَّه

طالعَه بْإيمان راضي وضمير .. فيها عدالَه وفيها نور

***

الهُوجَه دي مِن مأجورين .. لا لْها وَطَن ولا ليها دين

والمُرتابين مش معذورين .. لو يخلو بالقوي الأمين

مِن غير أجور والا بأجور .. وازاي اشكّ واكون جسور

***

مرسي مازال كل الأمل .. مِن غيرُه يفْدَح الخَلَل

سِيبُوه بحِزْبُه وسُلطتُه .. يأدِّي دُورُه ويتْسِئِل

لكن رئيس أعزل كسير .. ازَّاي يقوم بأيّ دور؟

==============