الأربعاء، 25 فبراير، 2015

كان في اختيار
كلمات
أيمن عز الدين
---------------------
مرسي اللي شاله م الميدان .. فوق الكتاف أحرار إراده
شافو انتخابُه دا الأمان .. من دولة الثورة المًضادّه
كان الاختيار: سِرقه وْ أمان .. جَنَّه وِنار، كفر وْ عباده
***
والوقتي ما فيش اختيار .. الوقتي بس نار ونار
سيسي مبارك، دغل غابَه .. نفس الجنيه: ملِك كِتابَه
عُمْلَه رخيصَه بْدون قرار ..السبعَه منهم بدولار
وكل يوم بتْزِيد هوان .. واللي يبيع يكسب يا سادَه
***
مِن كام سَنه والحُكْم جاير .. خمسَه وعشرين من يناير
كان حِلم لكن انقلب .. حقيقة واهُو عاد وانقلب
ولسَّه طول ما الدهر داير .. والطريق مليان مخاطر
ها ينقلب بينا كمان .. والسر مش عجلة قِيادَه
***
كان مُرسي حافظ للكِتاب .. راجي من الله الثواب
عامل لربُّه ع البَلَد .. لو خد لُه م الإخوان مَدَد
ما كان قدِر عليــ الذئاب .. لكن اللي مكتوب في الكِتاب
يا شعب طيب من زمان .. لك تاني فرصَه في الشهادَه
==================
تِفْرِقِ إيه ؟؟؟؟؟
كلمات
أيمن عز الدين علي السيد
=============
تِفْرِقِ إيه . تِفْرِقِ إيه . تِفْرِقِ إيه . تِفْرِقِ إيه
البشر مِن أب واحد .. الإلـه خلقه بْإيديه
دم واحد نفحَه واحدَه .. سِرَّها بيعيشو بيه
ودا له في الآخرَه جَنَّه .. ودا نار تُوصَدْ عليه
***
هُوَّ واحد، ما في منُّه غيرُه واحد
كل شيء إليه انتسابُه لْإنُّه واجد
يا غِفلتُه وْعِشت عنُّه فْ كُونُه شارد
يا رَأيتُه وْعِشت في الكون تِتِّقِيه
***
تِفْرِقِ إيه . تِفْرِقِ إيه . تِفْرِقِ إيه . تِفْرِقِ إيه
البشر مِن أب واحد .. الإلـه خلقه بْإيديه
دم واحد نفحَه واحدَه .. سِرَّها بيعيشو بيه
ودا له في الآخرَه جَنَّه .. ودا نار تُوصَدْ عليه
***
فقر مال – علم جهل .. أي حالَه
الرسول الأمِّي كان أهل الرساله
مش عظيم فِ عيون بَشَر عصر الجهالَه
إنما عنده ضمير يُبْنَى عليه
***
تِفْرِقِ إيه . تِفْرِقِ إيه . تِفْرِقِ إيه . تِفْرِقِ إيه
البشر مِن أب واحد .. الإلـه خلقه بْإيديه
دم واحد نفحَه واحدَه .. سِرَّها بيعيشو بيه
ودا له في الآخرَه جَنَّه .. ودا نار تُوصَدْ عليه
***
بَنَّا يحيا بْمَسْطَرِين يبني البيوت
ولا عالم ذَرَّه يخرب ملكوت
واللي وَايَّا الحَقّ مهما يكون بسيط
دا العبقري الألمعي الذكي النبيه
***
تِفْرِقِ إيه . تِفْرِقِ إيه . تِفْرِقِ إيه . تِفْرِقِ إيه
البشر مِن أب واحد .. الإلـه خلقه بْإيديه
دم واحد نفحَه واحدَه .. سِرَّها بيعيشو بيه
ودا له في الآخرَه جَنَّه .. ودا نار تُوصَدْ عليه
***
اللي شاف الجايّ وسْط الظلْمَه وَردي
واللي قال: بَلَدي ها تضحَك بُكْرَا بَعدي
واللي قال انا جسر للثورَه تعدي
مين ما شفشي نور إلـه الحق فيه
***
تِفْرِقِ إيه . تِفْرِقِ إيه . تِفْرِقِ إيه . تِفْرِقِ إيه
البشر مِن أب واحد .. الإلـه خلقه بْإيديه
دم واحد نفحَه واحدَه .. سِرَّها بيعيشو بيه
ودا له في الآخرَه جَنَّه .. ودا نار تُوصَدْ عليه
==================
سوء تقدير
كلمات
أيمن عز الدين علي السيد
=============
في كتاب لربك جَلِي : قرآن وسُنَّه
وكتاب قدَر مخفي ما تدركوش عيوننا
***
إنتَ إختارت القدَر وتعيش مُسيَّر
زيّ البهايم عارف انّ الجحيم مُقدَّر
وانَّك ما تقدَر ع المَتاب وِعَ الصلاح
والرب يفعل ما يشاء وانتَ فْ براح
تقتِل وتنهب ومش آخرتْها جَنَّه ؟
***
والا انتَ إنسان مُحترَم عابد لربَّك
مَهدِي لِنَجْدِيك وتختار بنُورُه دَرْبَك
قادِر تراجع كل وقت النيَّه فيك
وتتوب وقبل التوبَه ما تتقل عليك
كاظم مجاوب : ليس للإنسان ما تَمَنَّى ؟
***
الجَنَّه غاليَه . والجحيم فوق الخيال
جحيم خلود أجساد لا تفنى ولا تُزال
بتتبدل فيها الجلود بعد الجلود
وحميم يُصب في مقامع مِن حديد
دي على أهل الجحيم سِكِّتْها هايْنَه

============

الخميس، 5 فبراير، 2015

فوّضت مين
كلمات
أيمن عز الدين
----------------
كل شيء في الكون دا لُه عْلاقه بربَّك
مِن دُخول الجَنَّه لِدْخُول الخَلاء
تِذكُر المَوْلى بإحساسك وقلبَك
وبْيمينك وبْشمالك ع السواء
إنتَ إخترته إله وِطاعتُه حَسْبَك
ما لُه فِ إرادتكْ وفِعْلَك شُركاء
***
اللي خرَّج مِ النعيم آدم زمان
إنه يعصي ربُّه وِيْطِيع الشيطان
دا فِ حاجَه بسيطَه جدًّا مش فِ قتل
مش فِ سِرقه مش فِ مُلك وصولجان
قال لُه إوعَى الشجرَه أعرف منها قربك
وهوى للأرض لمَّا منها داق
كل شيء في الكون دا لُه عْلاقه بربَّك
مِن دخول الجَنَّه لدخول الخلاء
***
واختيارك لرئيس لا بُدّ فيه
إنُّه يبقى م الإله مَرْضِي عليه
للعدالَه للصلاح صُون الحدود
وانه يبقى حكيم لا طاغي أو سَفِيه
يبقى عُون لك إنَّ رَبّ الكُون يحِبَّك
لو تطاوعُه لإنُّه طـُوعه فْ لابتِداء
كل شيء في الكون دا لُه عْلاقه بربَّك
مِن دخول الجَنَّه لدخول الخلاء
***
كلّ صاحب فيلا أو ساكن فِ عِش
لو دَفَع فِ سيجارَه يومي بس قِرش
شوفو كم مليون فِ كل يوم يخش
يصنع الطبقات تلوث كل وش
إنتم اللي بْتِبْنو مجتمع السواء
كل شيء في الكون دا لُه عْلاقه بربَّك
مِن دخول الجَنَّه لدخول الخلاء
***
الرسول قال على إمْتَى يكون
ظهْر أرض الأمَّه أحسن مِ البطون
لو خيارنا أمراءنا، والغِنى
في كِرَامْنا السُّمَحا والشورَى لِنا
وان بطن الأرض تبقى خير لغلبك
من ظهورها لو عكسنا وحالنا ضاق
كل شيء في الكون دا لُه عْلاقه بربَّك
مِن دخول الجَنَّه لدخول الخلاء
***
مِيـ اللي قال دول شعب غيرنا واحنا شعب؟
مِيـ اللي شرّد أهل سينا وثار ما بيننا حرب؟
مِيـ اللي صادر دُور رعاية الفقير؟
مِيـ اللي حَصْر شُؤمُه صار ع الأمَّه صعْب؟
لا الدولار والدعم أول شيء فِ كَرْبَك
ولا نار الآخرَه في ليها انتهاء
كل شيء في الكون دا لُه عْلاقه بربَّك
مِن دخول الجَنَّه لدخول الخلاء
تِذكُر المَوْلى بإحساسك وقلبَك
وبيمينك وبْشمالك ع السواء
إنتَ إخترته إله وطاعتُه حَسْبَك
ما لُه فِ إرادتكْ وفِعْلَك شُركاء

====================
توت الجَنَّه
كلمات / أيمن عز الدين
--------------
اللي اتمنَّى توت الجَنَّه .. ما بيزهاش فِ عينيه تُفاحِك
إلا حَلالْنا ما بيحْلى لْنا وْ .. بنشوف فيه إبليس الضاحك
***
لُقمَه بْدُقَّه آكلها واعيش .. وأموت راضي لو ما فيش
دا القانع بالله مُعتزّ .. فِ إيمانُه وقناعتُه الكنز
والطماع كُونُه ما يكْفِيش .. يا نفسي يكْفيكي صلاحِك
***
اللي اتمنَّى توت الجَنَّه .. ما بيزهاش فِ عينيه تُفاحِك
إلا حَلالْنا ما بيحْلى لْنا وْ .. بنشوف فيه إبليس الضاحك
***
توب التوبَه أعظم تُوب .. يستر بيه المَوْلى ذنوب
والعاصي على إيه بيدوَّر .. غير أمثالُه عليه تتستَّر
والآخِر غير تُوبتي يْدُوب .. ما أَزْهَى يا تُوبَه جناحك
***
اللي اتمنَّى توت الجَنَّه .. ما بْيزْهاش فِ عينيه تُفاحِك
إلا حَلالْنا ما بيحْلى لْنا وْ .. بنشوف فيه إبليس الضاحك
***
بَعْد الله وْرِضْوانُه ما فاضل .. مُعطي للإنسان الفاضِل
وقبولِك مِن ضِدُّه مَذلَّه .. تسلِبْ مِنِّك رِضْوانُه قَبْلا
وامّا يروح رضوانُه إي فاضِل .. عيشي يا نفس على دا كفاحِك
***
اللي اتمنَّى توت الجَنَّه .. ما بيزهاش فِ عينيه تُفاحِك
إلا حَلالْنا ما بيحْلى لْنا وْ .. بنشوف فيه إبليس الضاحك

===================
لص
كلمات / أيمن عز الدين
------------------
يا اللي ما شُفْتِش عهد آدم قوم وبُصّ
أدي مصر صارت نُصّ واقِف ضِدّ نُصّ
قابيل ما شايف في الحياه غير نفسُه بَس
قتل النهار ولا عادشي  بالأنوار يحسّ
***
المؤمنين عند الإله إخوَه لِبعض
{كُونوا عِبادَ اللهِ إخوانًا} دا فَرْض
كل أخوك عليك حرام : مال دم عرض
والفِتنه لو بابها انفتح مش راح تخصّ
***
يا اللي ما شُفْتِش عهد آدم قوم وبُصّ
أدي مصر صارت نُصّ واقِف ضِدّ نُصّ
***
الظلمَه عَمِّتْ ع البلد مِ المَصابيح
إعلام يشكِّك يدْعي للكُفر الصريح
ولقتْل اخوك عشان رفَض بالدين يطِيح
صارت قضايا وألف حُكم عليه يُرَصّ
***
بقَى لمَّا ييجي رئيس كتاب الله فِ قلبه
والشعب يختاره وْيتْوِضِع في الأرض حُبُّه
تِسِيبُه في وشّ الخطَر ما تقفش جَنبُه
لا كمان سرقتُه واتهمتُه بإنه لِصّ
***
 يا اللي ما شُفْتِش عهد آدم قوم وبُصّ
أدي مصر صارت نُصّ واقِف ضِدّ نُصّ
قابيل ما شايف في الحياه غير نفسُه بَس
قتل النهار ولا عادشي  بالأنوار يحسّ

=================